::: SomaliTalk.com :::

Xamar oo Laga Qabanqaabinayo Banaanbax ka dhan ah Muuse Suudi iyo Maxamed Qanyare..

Dadweynaha ku nool Degmada Kaaraan ee Gobalka Banaadir ayaa waxa ay qaban-qaabo ugu jiraan banaanbax balaaran oo ay uga soo horjeedaan Max’ed Qanyare Afrax iyo Muuse Suudi oo iyagu si dabacsanaan ah uga hadlay heshiiskii dhexmaray Madaxweyne C/llaahi Yuusuf iyo Guddoomiyaha Baarlamaanka Shariif Xasan Shiikh Aadan iyo sida ay uga hor yimaadeen maamul u sameynta Gobalka Banaadir, waxaana banaanbaxaan la filayaa in ay ka qaybqaataan qaybaha kala duwan ee bulshada, waana markii ugu horeysay oo banaanbaxyo ka dhan ah hogaamiyaasha hubeysan uu ka dhaco Gobalka Banaadir, waxaana isa soo taraya dhaceybka ay dadweynaha u qabaan hogaamiyaashaasi oo mudo 15-sano ah hor taagnaa shacabka Soomaaliyeed iyo in dalku uu helo Dowlad iyo nabad buuxda. Banaanbaxaan ayaa marka uu ka dhaco Degmada Kaaraan waxaa la filayaa in uu ku baaho dhamaan degmooyinka Gobalka Banaadir oo iyagu aad uga soo hor jeestay hogaamiyaasha hubeysan ee Gobalka Banaadir marka la fiiriyo maalmihii la soo dhaafay. Dhinaca kale dadweynaha Degmada Wardhiigley ayaa iyagu talaabo ku dayasho mudan sameeyay kaddib markii iyagoo isku duuban ay si wadajir ah uga hor tageen isbaaro kooxo maleeshiyo ah ay dhigteen Isgooska Aadan Cadde ee degmada Wardhiigley, waxaana arrintaani ku tusineysaa sida dadweynaha Soomaaliyeed ay ugu adkeysan la’ yihiin kooxaha Maleeshiyooyinka ah ee mar walba gacan siinaya kooxaha hubyesa ee ku sugan Gobalka Banaadir.

Wixii ka dambeeyay markii uu soo baxay heshiiskii ay Magaalada Cadan ee dalka Yemen ku gaareen Madax-weynaha Dowladda Federaalka C/llaahi Yuusuf iyo Guddoomiyaha Baarlamaanka Shariif Xasan Shiikh Aadan ayaa markiiba waxaa aragtiyadooda dhiibtay xubno ka tirsan dhinacyada Jowhar iyo Muqdisho iyo qaar ka mid ah dadweynaha Soomaaliyeed oo u badan aqoonyahanada ku nool Dalka iyo Dibadda, balse su’aasha ugu muhiimsaneyd ee dhegaha loo taagayay waxay ahayd aragtida Wasiirada Hubeysan ee ku sugan Magaalada Muqdisho.

Wasiirka Ganacsiga Xaaji Muuse Suudi Yalaxow, Wasiirka Amniga Qaranka Max’ed Qanyare Afrax, Wasiirada Howlaha guud iyo Guryeynta Cismaan Xasan Cali Caato iyo Wasiiro iyo Xildhibaano aad ugu dhow Wasiiradaan ayaa il gaar ah ku eegaya waxa ka soo baxay heshiiskii ay gaareen Madaxweynaha iyo Guddoomi-yaha Baarlamaanka.

Saddex su’aaloo oo la weydiiyay Qanyare, Muuse Suudi iyo Cismaan Caato ayaa ahayd sida ay u arkaan iyo waxa ay ka yeelayaan iyo in ay soo dhaweynayaa heshiiska ay gaareen labada mas’uul, balse waay saddexdooduba ku gaabsadeen in aysan ka hor-dhaceynin ilaa inta ay ka ogaadaan isla markaana faahfaahin rasmi ah laga siinayo nuxurka heshiiska labada Mas’uul.

Xiriiro aan la sameenay mas’uuliyiintaan ayaa waxay ku sheegeen in arrinta ugu weyn ee Mugdiga ku jirta ee ay doonayaan in laga qanciyo ay tahay in si rasmi ah loo shaaciyo Magaalada Baarlamaanka uu ku kulmayo iyo saldhiga rasmiga ah ee Dowladda iyo waliba waxa laga yeelayo ciidamadii wadamada safka hore taas oo ay sheegeen in haddii arrimahaas aan si cad loo qeexin laga yaabo in weli madmadow uu ku jiro dhaqangalka heshiiska Cadan.

Barre Hiiraale iyo Xaabsade oo soo dhaweeyey Heshiiska Cabdulaahi Yuusuf iyo Shariif Xasan..

Wasiirada dib u dhiska iyo dib u dejinta Dowladda Federaalka ee Soomaaliya Barre Aadan Shire (Barre Hiiraale) iyo Xildhibaan Max’ed Ibraahim Xaabsade ayaa si taxadar leh uga hadlay natiijada ka soo baxday kulankii Cadan ee Madaxweyne C/llaahi Yuusuf iyo Guddoomiye Shariif Xasan Shiikh Aadan.

Barre Hiiraale oo gacanta ku haya Magaalada Kismaayo oo horey gogol ugu fidiyay garabyada Dowladda ee ku kala sugan Muqdisho iyo Jowhar ayaa sheegay in uu soo dhaweynayo heshiiska Madaxweynaha iyo Gudodomiyaha Baarlamaanka, Balse waxa uu meesha ka saaray in heshiiska ay gaareen Madaxweynaha iyo Guddoomiyaha Baarlamaanka uu yahay ka dhashay kulanka labada mas’uul balse waxa uu sheegay in heshiiskaan uu dhameystir u yahay gogoshii uu fidiyaya Isbahaysiga Dooxada Jubba.

Xildhibaan Xaabsade oo Baydhabo gacanta ku haya kuna sunga Magaalada Muqdisho ayaa isna sheegay sida uu u arko heshiiska waxa uuna sheegay in uu soo dhaweynayo haddii meesha laga saaro waxyaabihii markii hore keenay khilaafka, balse waxa uu intaa raaciyay Baarlamaanku ku kulmo Magaalada Baydhabo ay ka haboon tahay in ay ku kulmaan Magaalada Muqdisho oo caasimada Dastuuriga ah ee dalka.

Yuusuf Indha-Cadde “heshiiska dhexmaray Cabdulaahi Yuusuf Shariif Xsan waa mid lala galey Qol Mugdi ah..

Yuusuf Max’ed Siyaad Indha-Cadde oo ah Guddoomiyaha Gobalka Sh/hoose oo shalay la hadlaayeey warbaahinta ayaa waxa uu sheegay in heshiiska dhexmaray madaxweyne C/llaahi Yuusuf Axmed iyo Guddoomiya Baarlamaanka Shariif Xasan Shiikh Aadan uu yahay mid aan waxba ka khuseyn.

“Heshiiskaasi waxaan u arkaa mid lala galay Qol mugdi ah” ayuu yiri Yuusuf Indha-Cadde oo sheegay in Dowladda Federaalka ah ay Gobalka Sh/hoose uu wax badan ka tirsanayo.

Yuusuf Indha-Cadde waxa uu sheegay in loo baahan yahay in faahfaahin dheeraad ah laga bixiyo heshiiskaasi, sidoo kale waxa uu sheegay in markii horeba uusan aqoonsaneyn dowladdii lagu soo dhisay Magaalada Nairobi ee dalka Kenya, hase yeeshee Yuusuf Indha-Cadde waxa ay si aad ah isguu dhawaayeen Guddoomi-yaha Baarlamaanka Shariif Xasan, sidoo kale waxa uu dhawaan heshiis la gaaray Guddoomiyaha Gobalka Sh/dhexe Max’ed Dheere.

Wararka naga soo gaaraya Gobalada Dhexe waxa ay sheegayaan in dagaalo ay ka qarxeen deegaano ay wada degaan Beelaha Mareexaan iyo Suleymaan, waxaana dagaalkaan oo socday labo maalmood la xaqiijiyay in ay ku dhinteen ilaa iyo 16-qofood, ayna ku dhaawacmeen ilaa iyo 25 qofood.

Dagaalkaan xoogiisa waxa uu ka dhacay Tuulada Dacdheer, Xannan-Weylood, Qorof, Dhabad iyo deegaano kale, waxayna labada dhinac isku adeegsanayeen hubka noocyadiisa kala duwan.

Dagaalkaan waxa uu ku soo beegmay labada beelood deegaanadooda ay ka jiraan abaaro iy biyo la’aan hase yeeshee waxaa socda dadaalo lagu doonayo in lagu joojiyo dagaaladaasi ay sababayin ay dad fara badan ka qaxaan deegaanadoodii.

Hay’adda Xaquuqda Aadanah ee Gaashaan ayaa welwel iyo walaac ka muujisay dagaalkaasi, waxayna ka dalbatay Beesha bilowday dagaalka in ay hor seedaa talaabo wax ku ool ah oo daawo u noqon kara dhibka xaggooda ka bilwoday, ayna soo qabtaan dhagar qabayaashii ka dambeeyay colaadda halkaasi ka dhacday, waxaana qoraalkaan ku saxiixnaa Madaxa Hay’adda Cali Max’ed Maxamuud

.Hay'ada Care oo Xafuun Gaarsisay Deeq Doomaha Kalumaysiga.
.Xaaji Salaad Dhabarey oo soo jeediyey in kulanka ugu horeeye ee Golaha Baarlamaanka lagu.
.Aragtida dadweynaha ee heshiiska Cadan
.Ismaaciil Cumar Geele iyo Gen. Cadde Muuse oo kulan ku yeeshey Imaaradka..
.Muuse Suudi iyo Max’ed Qanyare oo si tartiib ah ug hadalay heshiiska ..
.Dowladda Talyaaniga oo dalkeeda ku martiqaaday cabdulaahi Yuusuf iyo Shariif Xasan..
.Xudur: Banaanbaxyo lagu taageerayo heshiiska...
.Soomaalida Qaxootiga ah ee ku nool dalka Yemen oo qoraal u gudbiyey
.War Saxafaafadeed Uu Soo Saaray Ugaaska Beesha Mareexaan Ugaas Maxamed Wali.
.Shir xaasaasi oo Beesha Cali Saleebaan kaga arrinsanayaan aayahooda oo Boossaaso ka dhacay..

Xaaji Salaad Dhabarey oo soo jeediyey in kulanka ugu horeeye ee Golaha Baarlamaanka lagu.

Xaaji Salaad Dhabarey oo ka mid ah ganacsatada waaweyn ee Soomaaliyeed ayaa si weyn u soo dhaweeyey heshiiska magaalada Cadan ku dhex maray madaxweynaha dowladda federaalka C/laahi Yuusuf Axmed iyo guddoomiyaha Baarlamaanka Shariif Xasan Sheekh Aadan wuxuuna ku tilmaamay mid danweyn ay ugu jirto shacabka Soomaaliyeed isla markaana kala qaybsanaantoodua aysan wax faa’iido ah ugu jirin shacabka Soomaaliyeed. Xaaji Salaad Dhabarey ayaa wuxuu soo jeediyey in kulanka ugu horeeya ee baarlamaanka lagu qabto maaagaalada Balacad isagoo magaaladaasi u doortay in ay tahay mid isku soo dhaweyneysa isla markaana u dhaxeysa magaalooyinka Muqdisho iyo Jawhar. Xaaji Salaad Dhabarey waxa uu ballan qaaday in qarashka ku baxaya kulanka ugu horreeya ee golaha baarlamaanka uu isaga bixin doono, tan iyo markii uu soo baxay heshiiskii dhex maray maadaxweyne C/laahi Yuusuf iyo gudoomimaha Baarlamaankaa Shariif Xasan ayaa Xaaji Salaad waxa uu noqday ganacsadaha kaliya ee ballan qaad dhaqaale ugu yaboohay kulanka baarlamaanka kaas oo lagu wado in uu dhaco soddon maalmood gudahood. Heshiiska dhexmaray Madaxwene C/llaahi Yuusuf iyo Guddoomiyaha Baarlamaanka Shariif Xasan Shiikh Aadan waxaa si weyn looga soo dhaweeyay dalka gudihiisa iyo dibaddiisa, waxaana si gaar ah u soo dhaweeyay xubnaha labada Gle ee ku kala sugan Magaalooyinka Muqdisho iyo Jowhar

Aragtida dadweynaha ee heshiiska Cadan
W/D: C/raxmaan Shariif Max’ed {Taysiir}
E-Mail: Taysiir55@hotmail.com

Khamiistii ayey aheyd markii hay’adaha warbaahinta ay la sare kaceen hadal heyn la xiriirta in uu guulestay shirkii ay madaxweyne C/laahi Yuusuf Axmed iyo guddoomiyaha baarlamaanka Shariif Xasan Sheekh Aadan uga wadsa hadlayeen khilaafka fadhiidka ka dhigay dowladda federaalka ee kala degan Muqdisho iyo Jawhar.

Dadaal uu sameeyey madaxweynaha dalka Yemen Cali Cabdalla Saalax ayaa waxaa ugu suuragashay in uu isa soo hor fariisiyo labadan mas’uul oo muddo sannad iyo lix bilood ah aan wax wada shaqeyn ah yeelan tiiyoo uu jiray is maandhaaf sababay in ay kala fogaadaan kaas oo ka dhashay halka ay dowladdu ku shaqeyneyso iyo waliba keenista ciidamo shishiiye oo suga ammaanka gudaha dalka Soomaaliya.

Wadahadalkan oo socday muddo saddex maalmood ah ayaa 5-tii bishan waxaa ay isla soo saareen qodobo ay isku af garteen oo uu ka mid yahay in baarlamanka federaalka uu yeesho kulan soddon maalmood gudahood laga bilaabo markii heshiiskaasi la sixiixay uuna isku arko gudaha dalka meel ka mid ah, haddaba sida ay heshiiskaasi u arkaan dadweynaha Soomaaliyeed si aan wax uga ogaano ayaa waxaan soo ururinay afkaartooda.

“Aniga ma aaminsani in heshiiska ay gaareen laban mudane uu wax ka badalayo xaaladda cakiran ee dalka, waayo, waxaa jira siyaasiyiin kale, oo aan la isku haleyn karin siyaasaddooda oo ka soo hor jeesan kara wax lagu heshiiyey, in kastoo uu yahay wax wanaagsan haddii uu dhaqan galo, waxaase maskaxdeena ka guuxaya waxyaabihi ay horey u saxiixeen raggan siyaasiyiinta ah ee ay hadana ka baxeen, oo ay daadka raaciyeen” ayuu yiri Cali Isxaaq Xasan {Cali-Yare) oo ah arday degan magaalada Muqdisho.

Sidoo kale, Sumayo Aadan oo aan arrintani sida ay u aragto wax ka weydiinay ayaa waxey tiri, “Waxaan u arkaa in guul weyn ay usoo hoyatay ummadda Soomaaliyeed sababtoo ah waxaa in ay wada shaqeyaan hadda ku baraarugay dowladdii aan ka dhur sugeynay oo awalba iyada dhexdeeda caqabad isku aheyd, waxaana ka rajeynayaa siyaasiyiinta kale ee dowladda ka tirsan in aaney noqon far soo taagan ee ay la qaataan waxa ay madaxdoodu ku soo heshiiyeen”.

Xasan Cismaan ayaa isagana mar aan weydiinay bal sida ay isaguna ula muuqdaan qodobadan ay ku heshiiyeen madaxweyne C/laahi Yuusuf iyo Gudoomiye Shariif Xasan, waxaa uu ku jawaabay, “Hadda ma dhihi karno dowladdii wey heshiisay, balse waxaan jawaab bixin karnaa marka aan aragno talaabooyin ficil ah oo ay ku muujinayaan waxa ay wada sixiixdeen, Illaahay ayaana ka rajeyneynaa in uu quluubtooda isku milo oo ka dhigo dad wada shaqeeya oo is jecel.

Sidoo kale waxaa iyana soo dhaweeyey heshiiskani siyaasiyiin kala duwan oo ku kala sugan magaalooyinka Muqdisho iyo Jawhar, waxaana gobalada dalka meelo ka mid ah ka dhacay banaanbaxyo lagu soo dhaweynayo heshiiska Cadan.

Heshiiskani ayaa haddii uu hir galo waxaa uu ka dhigi doonaa dowladda federaalka mid lugaheeda ku istaagta isla mar ahaantaana caalamka ka hesha dhaqaale uga xayirnaa khilaafkooda dartii.

Ismaaciil Cumar Geele iyo Gen. Cadde Muuse oo kulan ku yeeshey Imaaradka..

Madaxweynaha waddanka Jabuuti Ismaaciil Cumar Geelle ayaa magaalada Dubai ee waddanka Imaaraadka carabta kulana kula yeeshay madaxweynaha maamul gobaleedka Puntland Cadde Muuse waxeyna kulankoodaasi iskula soo qaadeen sidii loo xoojin lahaa xiriirka u dhaxeeya Jabuuti iyo maamul gobaleedkaasi gaar ahaan sidii ay labada dhinac isku dhaafsan lahaayeen arriamaha ganacsiga.

kulankaan ay yeesheen Ismaaciil Cumar Geelle ayaa wuxuu ku soo beegmay xilli ay ka qeyb galayeen tacsidii xaakimkii Dubai Sheekh Maktuub Al-Raashid.

Ismaaciil Cumar Geelle ayaa wuxuu sheegay sidoo kale in uu gacan siin doono dowladda federaalka ah wuxuuna meesha ka saaray in uu xun yahaya xiriirka u dhaxeeya dowladaha Itoobiya iyo Jabuuti gaar ahaan marka la eego isticmaalka dowladda Itoobiya ee dekadaha Soomaaliya.

Ismaaciil Cumar Geelle waxaa uu si weyn u soo dhaweeyey heshiiska dhex maray madaxweynaha dowladda federaalka C/laahi Yuusuf Axmed iyo guddoomiya baarlamaanka Shariif Xasan Sheekh Aadan waxaana uu ku tilmaamay in uu yahay mid muhiim gaar ah ugu fadhiya shacabka Soomaaliyeed.

Muuse Suudi iyo Max’ed Qanyare oo si tartiib ah ug hadalay heshiiska ..

Wasiirrka Amniga Qaranka Max’ed Qanyare Afrax iyo wasiirka Ganacsiga Muuse Suudi Yalaxow ayaa si dabacsanaani ku jirto u soo dhaweeyey heshiiska magaalada Cadan ku dhex maray madaxweynaha dowladda federaalka C/laahi Yuusuf Axmed iyo Gudoomiyahaya baarlamanka Shariif Xasan Sheekh Aadan.

“Waxaan dooneynaa in faahfaahin dheeraad ah nagala siiyo heshiiskaasi, waayo, meelaha qaarkood qodobada ku qoran ma cadda” ayey yiraahdeen Max’ed Qanyare iyo Muuse Suudi.

Wasiirada hubeysan ee magaalada Muqdisho waxaa looga fadhiyaa sidii ay u qaadan lahaayeen heshiiska uu soo saxiixay guddoomiyaha Baarlamaanka iyagoo mar kasta ku doodi jiray in madaxweynaha uu ku xad gudbay qodobo ka mid ah dastuurka, oo uu ugu horreeyo in dowladda ay soo degto magaalada Muqdisho hase yeeshee, qodobkani waa midkii koowaad ee ay isla af garteen madaxweynaha iyo guddoomiyaha baarlamaanka, waxeyse su’aashu tahay, wasiirada hubeysan ma u hogaansami doonaan heshiiskaasi?

Dowladda Talyaaniga oo dalkeeda ku martiqaaday cabdulaahi Yuusuf iyo Shariif Xasan..

Warar aanu helnay ayaa waxay sheegayaan in Madax-weyne C/laahi Yuusuf Axmed iyo Guddoomiyaha Baarlamaanka Shariif Xasan Shiikh ay martiqaad ka heleen Dowlada Talyaaniga, waxaana la filayaa in iyagoo wadajira ay gaaraan dalka Talyaaniga.

Dowladda Talyaaniga waxay ka mid ahayd Dowladdihii ugu horeeyay ee si weyn u soo dhaweeyay heshiiska dhex maray Madaxweyne C/llaahi Yuusuf Guddoomiyaha Baarlamaanka Shariif Xasan Shiikh Aadan, taas oo ay ku tilmaantay mid weyn ka taraya hannan socodka Dowladda Federaalka.

C/llaahi Yuusuf iyo Shariif Xasan ayaa la filayaa in ay dowladda Talyaaniga ka soo helaan taageero lacageed oo ay doonayaan in ay ku dhaqaajiyaan dowladda federaalka.

Banaanbaxyo lagu taageerayo heshiiska...

Wararka ka imaanaya Magaalada Xudur ee gobalka Bakool ayaa waxey sheegayaan in banaanbaxyo lagu taageerayo heshiiska 5-ta bishan ay wada saxiixdeen madaxweyne dowladda federaalka C/laahi Yuusuf Axmed iyo Guddoomiyaha Baarlamaanka Shariif Xasan Aadan waxayna ku dhawaaqeyeen ereyo ay ka mid ahaayeen “Waxaa soo carfaya saxan saxadii Dowladnimo ee Soomaaliya”, “kii ka hor yimaada heshiiska waa in si wada jir ah looga hortagaa”, iyo ereyo kale oo la mid ah.

Dadkii banaanbaxayay waxay kalloo soo dhaweeyeen heshiiskii Magaalada Muqdisho ay kuwa saxiixdeen waxgarad ka tirsan beelihii ku dagaalay deegaanka Tiyeeglow, waxayna heshiiskaasi ku tilmaameen mid soo afjaraya dagaalka, kaas oo ay sheegeen in uu ahaa mid mar kasta soo noq noqday.

Soomaalida Qaxootiga ah ee ku nool dalka Yemen oo qoraal u gudbiyey

Wararka naga soo gaaraya Dalka Yemen waxay sheegayaan in Dadka Soomaaliyeed ee qaxootiga ku ah dalka Yemen ay warqad qoraal ah u gudbiyeen Madaxweyne C/llaahi Yuusuf Axmed iyo Guddoomiyaha Baarlamaanka Shariif Xasan Shiikh, waxayna qoraalkooda uga dalbadeen Madaxweynaha in ay gacan ka gaystaan sidii Dowladda Yemen ay magdhow uga bixin lahayd dilkii dhowr qof oo Soomaali ah oo dhawaan lagu dilay xarunta Hay’ada Qaxootiga ee Qaramada Midoobey ee UNHCR, mar ay ka banaanbaxa-yeen cabasho la xiriira in loo qaado dal kale oo ka nolo wanaagsan midka haatan ay ku sugan yihiin. “Waxaa dowlad u tihiin shacabka Soomaaliyeed ee waa in aad wax ka qabantaan dhibkii ay noo gaysteen ciidanka Booliiska ee Wadanka Yemen” ayay ku yiraahdeen qoraalkooda Qaxootiga Soomaaliyeed ee ku nool dalka Yeme oo si wanaagsan u soo dhaweeyay heshiiska ay gaareen Madaxweyne C/llaahi Yuusuf iyo Guddoomiye Shariif Xasan Shiikh Aadan, waxayna heshiiskaasi ku timaameen mid waxtar weyn u leh dadka soomaaliyeed ee Qaxootiga ku ah daafaha adduunka, iyo waliba kuwa ku sugan dalka gudihiisa

W/D Amiin Yuusuf Khasaaro
Email amiinkhasaaro@hotmail.com

War Saxafaafadeed Uu Soo Saaray Ugaaska Beesha Mareexaan Ahna Afhayeenka Salaadiinta Beesha Daarood Ugaas Maxamed Wali.

Waxaa soo tebisey Canab Mumtaz

Waxaana Warsaxaafadedkaan uu kaga hadlayay abaaraha ka taagaan gobolada koonfurta soomaaliya haba ugu darnaatee gobolka Gedo oo ay ku dhinteen inta la og yahay sida warsaxaafadeedka ku cad dad gaaraya 25 Qof waxaana Warsaxaafadeedku u qornaa Sidatan

02/01/2006

BISMILAAH
WAR SAXAAFADEED

UJEEDO,QAYLO DHAAN KA TURJUMAYSA ABAARO BA’AN OO KATAAGAN GOBOLADA KOONFURTA SOOMAALIYA

Sida aan ognahay waxaa hareeyey koonfurta Soomaaliya abaaro ba’an oo waxyeelo u geystay dad iyo duunyaba.

Sida Bay,Gedo,Marko Iyo Bu’aale. Dadka ku nool gobolada aan soo sheegney waxay roobla aan yihiin todoba bilood, hadana way sii kala daran yihiin. Gobolada sida gaar ka ah ula il daran abaarta waxaa ka mid ah Gobolka Gedo.

Dadkii iyo duunyadii ku nooleyd gobolka gedo waxay bilaabeen dhimasho ay sababtey oon iyo gaajo, xoolihii waxay bilaabeen dhimasho laga bilaabo 10,11,2005, dadkiina waxay dhimashadu ku bilaabatey 20,12,2005.

Mar aan la xiriray qaar kamid ah wax garadka ku nool gobolka Gedo, 1-1-2006 waxay ii xaqiijiyeen in ay oon iyo gaajo ugu dhinteen deegaano ka mid ah degmooyinka gobolka 25 qof inta la ogyahay, ilaa 100 qof oo kalena aan lahaynin meel ay jaan iyo cirib dhigeen, ilaa iyo hadana majiraan wax gurmad ah oo gaarey deegaanadaa ay masiibadu kadhacdey, ama wax isku day ah, oo lagula tacaalayo masiibooyinkan balaaran.

Dadka iyo duunyada ku nool gobolka Gedo, hadii aysan helin10ka casho ee soo socota Deeq Ilahay oo dheeraad ah, ama, gurmad bini aadam oo deg deg ah, waxaa laga yaabaa inay kadhacdo masiibo balaaran oo dad iyo duunyaba waxyeelo u geysta, waxaa si deg deg ah loogu baahan yahay Booyado Biyo dhaamiya,nafaqada Caruunta,haweenka iyo dadka waa yeelka ah.

Waxaan ugu baaqayaa dawladaha Deeqda bixiya,hay’adaha dawliga ah kuwa aan dawliga ahayn iyo ganacsatada madaxa banaan in gurmad deg deg ah lala soo gaaro, dadka ay ku habsatey abaarta ay kadhalatay gaajada iyo Biyo la’aantu.

Waxaa diyaariyey iskuna duba riday, Ugaaska Beesha Mareexaan,ahna afhayeenka salaadiinta beelaha daarood, Ugaas Maxamed Wali Sheekh Axmed Nuur.

Email: Kulimiyepress@hotmail.com

Shir xaasaasi oo Beesha Cali Saleebaan kaga arrinsanayaan aayahooda oo Jan 5, 2006 Boossaaso ka dhacay..

Shir xaasaasi oo Beesha Cali Saleebaan kaga arrinsanayaan aayahooda oo maantay Boossaaso ka dhacayShir balaaran oo looga hadlaayey la jaanqaadka siyaasada , canshuuraha iyo isku xirnaanta Beesha ayaa maantay lagu qabtay hudheelka Karaama 2 ee magaalada boossaaso

Waxaana shirkaasi ka soo qayb galay aqoonyahano waxgarad ganacasato isimo iyo qaar ka tirsan labada gole ee dawladaha Puntland iyo tan Federaalka oo beesha ka tirsan.

Shirkaan waxaa soo qaban qaabiyay Dr C/qaadir Maxamuud Cali oo ka mid ah Jaaliyda Beesha ee ku dhaqan Dalka Holland.

Ugu horayn waxaa halkaasi hadal kooban ka jeedeiey Beeldaaje faraax cabdulaahi oo ku waaniyey dadkii gobtaasi isugu yimi in ay gacmaha is qabsadaan.

intaa ka dib waxaa hadalkii qaatay Dr: C/qaadir Maxamuud Cali oo ah ninka suurta geliyey in meel la isugu yimaado oo ka hadlay maraxladihi la soo maray iyo waxa la rabo in haatan lagu tashado oo lagu dhaqaaqo.

cali kahliif ma ubaal gudidoonaa Beesha Cali Saleebaan

Beesha Cali Saleebaan oo Taageeray Cali Khaliif
Baaq ka soo baxay beesha Cali saleebaan ee UAE ayaa... Guji

Prof: Galeyr oo Qado Sharaf u Sameeyay Siyaasiyiinta Beesha Daarood
Waxana uu muujiyey in uu Doonaayo in uu mar labaad isu soo taago jagada ugu saraysa hoggaanka Soomaaliya Guji

Dhaman dadkii kale ee goobtaasi ka hadlay waxay isku raceen in hal mawqif la qaato lagana doonto dawlada fedraalka iyo tan Puntland waxii saami ahaan beeshu ka hesho.

Mar laga hadlaayey cashuuraha tirada badan ee maamulku Puntland soo rogay aaya waxaa la isku raacay in aan la qaadan waxii aan maslaxadi ku jiran'.

Beesha Cali saleebaan oo ah Beesha ugu tirada badan Gobolka bari ahna Beesha keli ah marka laga hadlaayo dhaqaalaha ugu tunka weyn ayaa maanta shirkoodu waxa uu ahaa Mid uu soo abaabulay Dr: C/qaadir Maxamud Cali.

Shirkaan beeshu waxay xooga ku saaratay in midnimda Puntland tahay mid muqadas ah oo aan la dhaafi karin waxay kaloo ka hadleen doorka ay ka qadan karaan amniga gobolka iwm.

Mire Xaaji farax wasiir ku xigeenka lacagta dawlada federaalka ah ayaa goobtaasi ka sheegay in ay muhiim tahay in wada shaqayn lala sameeyo maamulada dalka ka jira laguna dadaalo isku xirnaanta.

Por: C/weli gayre oo ah wasiirku xigeenka Qorshaynta Puntland ayaa isna halkaasi ka jeediyey warbixin dheer oo kaga hadalaayey habkii loo maamulay Golohii degaanka Gobolka karkaar taasoo Beeshu ka muujisay caro lixaad leh ayna u arkeen in lagu tuntay xaquuqdoodi degaanimo.

Gudiga Siyaasada Cali Saleebaan

calisaleebaan@yahoo.com

Faafin: SomaliTalk.com | Jan 7, 2006