I    I    D    H    E    H

Mac-Hadka  ASAL ee Barashada Computerka iyo Xisaabaadka Ganacsiga:   km-5 Mogadishu

Wararka Maanta waxaa ka mida: 

*Qaar Ka Tirsan Hogaamiye Kooxeedyada Oo Ka Carooday......
*Shaati Guduud oo ka ambabaxay Baydhabo.
*Urur cusub oo looga dhawaaqay Beledweyne
*Guddoomiyaha qawmiyadda Carabta Soomaaliyeed Oo sheegay....

A. D. | weekly@somalitalk.com 
SomaliTalk | Muqdisho, Soomaaliya

Qaar Ka Tirsan Hogaamiye Kooxeedyada Oo Ka Carooday Hadalkii Ka Soo Yeeray Wasiirka Ariamah Dibada Ee Dalka Kenya

Md. Hilowle Imaam Cumar, oo ah mid ka mida guddoomiyayaasha kaltanka golaha SRRC-da, ayaa si kulul uga jawaabay hadalkii uu sii daayay wasiirka arimaha dibbadda ee dalka Kenya, warkaas oo ahaa, in dawladda KMG ahi ay ka soo qayb galayso shirka dib u heshiisiinta Soomaalida, iyadoo wadata magac dawladnimo. Hilowle Imaam Cumar ayaa ku celceliyay ereyadiisii ahaa, kooxda Carta iyo in golaha SRRC ay isa soo horfariisan doonaan.

Md. Hilowle, ayaa sidoo kale sheegay inuu ka xunyahay warkii ka soo yeeray Md. Cusmaan Caato, kaas oo sheegayay in qaar ka mida madaxda SRRC lagu haysto Itoobiya qaab madax furasho, sida uu Md Caato hadlka u dhigay.

“SRRC, waxay xarumo ku leedahay Baydhabo, Muqdisho iyo Addis Abeba, halkaas oo ay ka fuliyaan arimaha quseeya golaha SRRC” sidaana waxaa yiri Md. Hilowle Imaam Cumar oo waraysi siinayay idaacada qur’aanka Kariimka.

Hadaladan ka soo yeeray wasiirka arimaha dibadda ee dalka Kenya Md. Madoka ayaa wuxuu si weyn uga caraysiiyay hogaamiye kooxeedyo fara badan, iyagoo qaarkoodna ay sheegeen in ay arintaas dacwad ka gudbin doonaan.

Shaati Guduud oo ka ambabaxay Baydhabo

Madaxweynaha is-maamul goboleedka Koonfur Galbeed ee Soomaaliya Md. Shaati Guduud iyo wafdi u hogaaminayo, ayaa shalay ka dhoofay garoonka diyaaradaha ee magaalada Baydhabo, isagoo ku sii jeeda Doolow ee dhinaca Itoobiya, safarka Shaati Guduud ayaa lagu soo waramayaa inuu ka danbeeyey ka dib markii la sheegay in dawladda Itoobiya ay casuumaad u fidisay isaga iyo Shiikh Aadan Madoobe oo haatan si ba’an isaga soo horjeeda iyagoo horeyna ugu dagaalamay magaalada Baydhabo.

Dawladda Itoobiya ayaa la sheegay inay doonayso inay dhexdhexaadiso dhinacyadan is haya ee horey uga wada tirsanaan jiray ururka RRA.

Shiikh Aadan Madoobe oo isna ka ambabaxay magaalada Diinsoor isagoo sii maraya dhulka, kuna sii jeeda Dooloow ee dhinaca Itoobiya, ayaa sheegay inuusan marnaba la kulmaynin Shaati Guduud.

Warar kale ayaa soo baxaya oo sheegaya in dowladda Itoobiya ay ugu yeertay raggan iyo kuwo kaleba, sidii aya mar kale isugu keeni lahayd golaha SRRC, oo beryahan danbe u muuqday mid sii kala daadanaya.

Dhinaca kale, odoyaal dhaqameedyo iyo waxgarad ka tirsan Raxanweyn oo ku hawlanaa isu keenidda Shaati Guduud iyo ku xigeenadiisii ururka RRA, ayaa sheegay in arintu meel fiican u marayso, ayna dhimantahay oo kaliya inay isa soo hor fariistaan.

Urur cusub oo looga dhawaaqay Beledweyne

Urur cusub oo la magac baxay USC/UJH, ayaa looga dhawaaqay gobolka hiiraan magaala madaxdiisa B/weyne, ururkan oo guddoomiye loogu doortay inu noqdo Dr. Axmed Cumar Gaagaale, ayaa sheegay in ururkiisan cusubi uu ka shaqayn doono danaha beesha Baadi Cadde, oo uu sheegay guddoomiyuhu in beesha Baadi Cadde ay danaheedii ka dhex weysay ururada kale ee jira, taasina ay tahay sababta ku dhalisay in la dhiso ururkan cusub oo uu ku nuuxnuuxsaday inuu ka soo jeedo deegaan baaxad weyn laguna yaqaano dadka ku dhaqan wadan jacayl.

“Waxaan aaminsanahay 8 gobol oo kaliya inuu ka kooban yahay dalka Soomaaliya, waana wax kama jiraan 18 gobol” sidaana waxaa yiri guddoomiyaha ururkan cusub Dr. Axmed Cumar Gaagaale oo u waramayay, idaacadda Benaadir ee Muqdisha.

USC/UJH ayaa wuxuu ka mid noqon doonaa ururada ka sii farcamay urur weynihii USC oo ay ku midaysnaayeen beesha Hawiye, ka dib markii ismaandhaaf siyaasadeed oo xoogani soo kala dhexgalay beelihii ku abtirsan jiray USC.

Md. Thaabit: ma jirto dhibaato gaar ah oo naloo gaystay, wixii dhacayna waxaanu la qabnaa umadda Soomaaliyeed.

Guddoomiyaha qawmiyadda golaha Carabta Soomaaliyeed oo uu fadhigiisu yahay magaalada Muqdisho, Md. Abuukar C/qaadir Thaabit, oo ka hadlayay dhinacyo badan ayaa sheegay, in ay ka qayb gali doonaan shirka dib u heshiisiinta Soomaalida ee ka dhici doona Eldoret  ee dalka Kenya iyagoo ka mida golaha SRRC.

“waxaanu ka mid nahay golaha SRRC, iyaga ayaanuna wax la qaybsan doonaa” sidaana waxaa yiri Md. Thaabit oo intaa ku diray in dadka Carabta Soomaaliyeed ee uu isagu metelo ay ku nool yihiin dhamaan 18-ka gobol ee uu ka kooban yahay dalka, wuxuuna intaa ku daray in aysan jrin dhibaato iyaga si gaar ah u taabatay, ayna kal sinaayeen wixii wada gaaray umadda Soomaaliyeed dhib ama dheef.

Md. Thaabit ayaa sheegay inuusan aqoonsanayn wax la yiraahdo dawlad KMG ah oo dalka ka dhisan, wuxuuna ugu yeeray kooxda Carta, sida ay inta badan ee hogaamiye kooxeedyada ka soo horjeeda natiijadii Carta ay ugu yeeraan dawladda KMG ah.

Mogadishu Weekly Reporter A. D.

  weekly@somalitalk.com 
Muqdisho, Soomaaliya

SOMALITALK.COM | Sept  9, 2002  

WARARKII HORE EE MOGADISHU WEEKLY REPORTER - GUJI

WARARKA KALE AGOOSTO  | WARARKii  July» GUJI
» June |  MAY APRIL | MARCH | FEBRAAYO | Janaury 2002 | Wararkii 1999-2001  em@spam.com