MAREEKANKA OO DHEXDOODA KHILAAF KA TAAGAN YAHAY SADDAAM KADIB
ISHA: Guardian UK | April 2, 2003

Hadday noqon lahayd dagaal saxaafadeed iyo haddii kaleba, waxaa sida ay shaleey daabacday wargayska ka soo baxa England ee The Guardian inuu khilaaf cusub ku soo biiray mas’uuliyiinta sarsare ee maamulka Mareekanka, kaasoo ku saabsan ajandaha iyo qorshe maamuleedka la cuskan doono markii laga takhalluso maamulka Saddam.

Wargayska ayaa boggiisa internetka ku sheegay inay 23 wasaaradood oo mareekan ah ay marka hore maamuli doonaan Ciraaq, iyadoo wasaarad kasta oo ka mid ah wasaaradahaasna ay yeelan doonto 4 la taliyayaal ciraaqiyiin oo ay soo magacaabi doonaan saraakiisha mareekanka.

Waxa uu wargayska intaas ku daray, in magaalooyinka ay gacanta ku dhigaan ciidamada isbahaysiga ay toos u maamuli doonaan maamulka ku meel gaarka ah ee ciidamada Mareekanka, waxaana arrintan magacaabi doona Jeneraalka Tommy Franks, isagoo kagana amar qaadanaya sidaas xukuumadda ku meel gaarka ah ee uu hoggaaminayo jananka lagu magacaabo Jay Garner oo ah janaraal ciidamada mareekanka uga soo ahaan jiray, dhinaca kalena lagu wado inuu maamuli doono xukunka milateri ee lagu qabsan doono Ciraaq.

"Ciraaq waa in ay markii u horeysey tobanaan sano maamulaan dadka Ciraaqiyiinta ah" Blair ayaa sidaas yiri sida ay werisey IOL

Wuxuu wargayska intaas ku daray, in go’aannada lagaga duulayo maamulka Ciraaq ay si guud ahaan u hoos imaan doonaan maamulka Mareekanka, gaar ahaan ninka lagu magacaabo Poul Wolfowitiz oo ah wasiir ku xigeenka gaashaandhiga Mareekanka, arrintan oo ay si daran uga caro gelisay Garner oo ku qasbanaaday inuu aqbalo shakhsiyaad ciraaqiyiin ah oo dood ka dhaliyay magacaabiddooda si ay isaga ugu noqdaan la taliyayaal.

Sida uu wargayska Guardian sheegay, waxyaabihii sii kiciyay khilaafka iyo doodda ayaa ka mid ahaa Wlfowitiz oo soo rashaxay Ahmed Chalabi oo ah mid ka mid ah axsaabta ka soo horjeeda maamulka Saddaam iyo qaar ka mid ah ragga isaga u dhowdhow oo uu ku jiro nin ay xigto dhow yihiin.

Sannadihii ugu danbeeyay wuxuu Ahmed Chalabi kasbanayay xiriirka uu la lahaa gaashaandhiga Mareekanka ee Pentagon, jeer ragga sare ee maamulka Bush sida wasiirka gaashaandhiga USA Donald Rumsfeld uu isaga si weyn u taageero, halka wasaaradda arrimaha dibadda ee mareekanka iyo wakaaladda sirdoonka mareekanka ee CIA ay ninkan ku eegaan aragti shaki leh.

Ahmed Chalabi oo sannado badan mucaarad ku ahaa maamulka Ciraaq ayaa sida uu wargayska tibaaxay ku noolaa dibadda Ciraaq laga soo billaabo sannadkii 1956-kii, waxaana loo badinayaa sida uu Guardian sheegay inuusan lahayn shacbiyad sidaas u badan.

“wuxuu filayay Ahmed Chalabi in loo magacaabi doono ra’iisal wasaaraha cusub ee dowladda ku meelgaarka, hase ahaatee wuu ka xumaaday Chalabi in ajandaha mareekanka uusan taladaas isaga u dhiibaynin kadib markii la tuuro Saddam” ayeey qortay Guardian oo sidoo kale wareysatay nin ay Chalabi isku xisbi yihiin oo sheegay inuusan Chalabi aqbali doonin inuu la taliye kaliya ka noqdo maamulka cusub ee ay xukuumadda Washington ka damacsan tahay inay wax kaga beddesho guud ahaan gayiga barriga dhexe.

Dhinaca kale, wuxuu kaloo wargayska The Guardian shaaca ka qaaday in samaynta maamulka mareekanka la filayo inuu ku dhalin doono welwel siyaasadeed oo daran ra’iisal wasaaraha Britain Tony Blair, kaasoo isaga doonaya inuu xoogga saari doono sidii arrintan iyada ah iyo dib u dhiska Ciraaq-ba gacanta loogu wareejin lahaa Qaramada Midoobay iyo Mujtamaca dowliga.

Waxyaabaha khilaafka dhaliyay xittaa waxaa ka mid ah muddada xukunka milateri lagu maamulayo Ciraaq dagaalka kadib iyo aragtiyo kala duwan oo ay arrintan ka kala qabaan wasaaradda arrimaha dibadda mareekanka iyo wasaaradda gaashaandhiga. Sida uu qoray wargayska Washington Post in xooghayaha arrimaha dibadda mareekanka iyo la taliayaashiisuba inay qabaan ra’yiga Tony Blair ee oranaysa in maamulka Ciraaq ee Saddaam kadib loo dhiibi Qaramada Midoobay, iyo sidii dalalka kale ee diiddanaa dagaalka Ciraaq loogu dari lahaa ka qayb qaadashada dib u dhiska Ciraaq. Hase ahaatee, wasiirka gaashaandhiga Rumsfeld iyo ku xigeynkiisa oo uu taageerayo madaxweyna ku xigeen Mareekanka ayaa diiddan aragtidaas, iyagoo ka cabsi qaba inay dadaalkii mareekanka ee Ciraaq uu meesha si sahlan uga baxo.

Inkastoo uu jiro ajandahaas ay degsadeen maamulka Mareekanka, haddana waxaa dhici kara inay soo cusboonaadaan wax si weyn wax uga beddela qorshahay degsadeen.

Dagaalkii ay ciidamada Mareekanka iyo ingiriiska ku qaadayeen ayaa meeshiisii ugu darneyd weli ka socda Ciraaq. Siday maanta sheegtay wakaaladda wararka ee Reuters wuxuu kongareeska mareekanka oggolaaday sharci siinaya madaxweynaha mareekanka Bush lacag gaaraysa ilaa 78 bilyan oo USD, lacagtan oo lagu siyaadinayo qarashka ku baxaya dagaalka Ciraaq.

Isha:
http://www.guardian.co.uk/international/story/0,3604,927003,00.html
http://www.reuters.com/newsArticle.jhtml?type=topNews&storyID=2495926

Tarjirmadii Ibraahmi Saalax | SomaliTalk Denmark

April 2, 3003

WARARKII HORE EE DAGAALKA CIRAAQ...  

 <> TAARIIKHDA CIRAAQ ... HALKAN GUJI <>  

• Akhri Qoraalkii islamonline ee weerarka dhulka Ciraaq....
• Akhri Wararka CBC ee Ciraaq.....
• Akhri wararka shabakada Canada.com
• Akhri wararka yahoo 
• DAAWO: CANADA.TV |  AljazeeraTV | SaudiTV | BBC.TV
• AfricWorld Tonight |  Focus On Africa
  Network Africa |  Chennel Africa
• DAAWO: ABU-DHABI.TV  | REAUTERS.TV