Asalaamu caleykum waraxmatulaahi wabarakaatuhu. Mahadoo dhan Illaahay u sugnaatay,
naxariis iyo nabad gelyana rasuulka Allaha kor yeelo. Waxan halkan salaam u gudbinayaa
dhamaan walaalaha qiimaha leh webkan somalitalk iyo inta soo booqataba. Walaalayaal sida aad ogtihiinba caalamkan aynu ku nool nahay waxaa maalinba isa soo tarayay cilmiga casriga ah kaasoo maanta aynu arkayno natiijada oo ay ugu dambeyso aaladan internetka ee aynu adeegsano, waxa soo socdana Allah un baa og. Iyadoo ay sidaa tahay, halkii aynu ka faa'ideysan lahayn ama dadka ugu faa'ideyn lahayn ayaa waxaad arkeysaa shaqsiyaad had iyo jeer u taagan marin habaabin isku dir iyo ka been sheegid wax walba, haday ahaan laheyd diinta, cilmiga adduunyada, arimaha dalkeena, waxana mar walba ka soo burqada fikrado aan bur-bur maahee waxba toosineyn. Haddaan usoo noqdo dulucda maqaalkeygan waxan shalay 24/10/2005 anigoo meereysanaya shabakadaha netka gaar ahaan kuweenan somaliga, isha ku dhuftay maqaal ku soo baxa isniin walba webkan somalitalk uuna so!
o diyaariyo inanka ku dheereeya riyada is daba jooga ah waa FAHAD YAASIINE, asigoo markan ku soo qaatay maqaal uu cinwaan uga dhigay (SUUFIYADA IYO BISHA SOONKA) haddana in riyo tahay iyo in kale ma ogi. Walaalayaal hadaad u fiirsataan maqaalkan waxaa si toos ah uu ugu durduriyay ulajeedaduna ahaydba Culimada suufiyada oo aanu ognahay darajada ay ku dhex leeyihiin Dunida islaamka maantana aynu harsaneyno cilmiga laga soo gaaray caalimiinta waaweyn ee suufiyada.

Maaha wax lala yaabo in qof fikir aminsan yahay, laakiin haddii uu damacsan yahay inuu fidno abuuro waa in laga feejignaadaa. Waxuu soo jeediyay in laga hortago waxa uu ugu yeeray qilaafka suufiyada ee bisha Ramadaanka isagoo markaa inoo muujinaya iney sax yihiin Culimada batroolka, iyadoo la ogyahay qilaafka ugu weyn ee dunida islaamka ka taagan maantadan ka mas'uul yihiin culimada batroolka. Haddii aan soo qaato eedeynta uu huwiyay Culimada suufiyada, waa arin uu ku deg degay micnaha qilaafka iyo cilmiga ka dambeeyo uusan ogeyn ama ogyahay laakiin is moogeysiiyay fidno darteed.

Walaalayaal Bisha Ramadaanka sida aad ka war heysaan sanad waliba waxaa ka taagan dood dunida islaamka taasoo lagu kala tagay raacista xadiiskii Rassuulka SalaLLaahu caleyhi wasallam (Ku sooma aragtida bisha Ramadaan kuna af fura aragtideeda) iyo in falaga la raaco. Soo shaac bixii raacista cilmiga falaga in loo adeegsado bisha Ramadaan waxay bilaabeen culimada islaamka ee falaga ku xeel dheeraa qarnigii 3aad illaa 7aad hijriyada iyagoo adeegsanayay cilmigii baabiliyiinta, kaasoo lagaga dhaqmayay dunida islaamka muddo badan illaa ay ku bedelaan si tartiib ah raacista taariikhda shiinaha, hindida iyo miilaadiyada taasoo dhalisay dhibaato weyn sidii lagu ogaan lahaa bilawga bilaha hijriyada, sababaha dib ayaan idinkaga faaloon doonaa waqtiga oo igu yar iyo daliilka cilmiga falaga oo aan ku soo koobi Karin maqaalkeygan, balse waxaan jeclahay inaan halkan idinkugu soo gudbiyo sababaha dhaliya is qilaafka dowladaha islaamka manta ee uu dusha ka huwiyay FAHAD YAASIIN culimada suufiyada kaliya ayagoo ku taagan xadiiska Rassuulka SalaLLaahu caleyhi wasallam (Ku sooma aragtida bisha Ramadaan kuna af fura aragtideeda) waana sidan:
 
1.             Wadamada islaamka qaar ayaa ugu yeera shacabkooda inay baadi goobaan bisha ramadaan taasoo haddii qof uu ku dhaarto aragtideeda laga aqbalo xitaa haddii aysan suuragal ahayn ama ay adag tahay falag ahaan waana sida ay u badan tahay dunida islaamka.
2.             Wadana kale ma ogolaadaan shahaadada qof sheegtay aragtideeda haddii xisaab ahaan suuragal ahayn balse waxay ogolaadaan markay adag tahay in la arko haddii xisaab ahaan ey suuragal tahay waana habka ay ku dhaqmaan culimada batroolka.
3.             Waxa jira dowlado kale aanan ku dhaqmin aragtida bishaba sida liibiya oo ku socota falaga.
4.             Dunidan islaamka ayaaba ah kuwo aan raadinin bilawga bisha iyo dhamadkeedaba marka laga reebo wadanka marooko iyo cumaan oo illaa xad ah. Teeda kale wadamada islaamka badankood waxay u diraan shacabkooda iyagoo qaata aragtida qof sheegtay wuxuu ahaadaba taasoo dhalisay iney soomaan malaayiin muslimiin ah wadanka sacuudiga sanadka 1404 H 28 maalmood kaliya sababta qof arkay xidigaha mercury iyo venus una maleeyay bisha. Raadinta bisha iyo aragtideeda si wadajir ah waa arin muhiim ah si loo ogaado waxa qof kali ah arkay iney tahay bisha oo aysan aheyn wax
kale.
5.             Wadano qaar ayaa qaata aragtida wadamo kale kuna sooma sida urdun oo kale waa wax u dagsan sharci ahaan, halka wadano kale aysan aqbaleyn noocan balse kaliya ay ku soomaan aragtida bisha Ramadaan gudaha wadankeeda sida isla Sacuudiga laftigooda oo bishii Ramadaan 1420 H oo ay bayaanisay dowlada Yemen 8/12/1999 kowda bisha Ramadaan iyadoo dhaarisay shacab ay ku jiraan imaamyada masaajidda balse Sacuudiga wey
ku gacan seyrtay jaarkeeda, waxayna bilawday 9/12/1999. Sidoo kale sanadkii 1424 H waxaa bayaaniyay wadanada Yemen, Urdun, Falastiin iyo Masar in maalinta 25/10/2003 tahay kowda ramadaan, laakiinse Sacuudiga sida caadada u ah ku gacan seyrtay. Bal hadaba ka taliyoo yaa u macalina musiibadan.
 
Haddii aan ka hadlo wadankeena Soomaaliya sida aan ogahay dad badanna ii sheegeen tariikhda dhow laguma hayo sanad aan Sacuudiga isla bilawnay bisha Ramadaan ayadoo wadankeena laga aminsan yahay xadiiska Rassuulka SalaLLaahu caleyhi wasallam (Ku sooma aragtida bisha Ramadaan kuna af fura aragtideeda) anigoo maqli jiray Raadiyo muqdisho oo laga dhaarinayo dhowr qofoo aragtay. Teeda kale haddii Yemen iyo cumaan oo jaar la ah Sacuudiga ay qilaafeen maxaa wadankeena ku qasbaaya inay raacaan, ogaadana walaalayaal wadanka khilaaf kama jirine raaciyada culimada batroolka waxay ka faa'ideysteen dowlad la'aanta iyo fowdada ka jirta wadanka sidaas ayayna ku abuureen khilaafka wadankeena ka jira ee uu dusha ka huwiyay FAHAD YAASIIN culimadeena sharafta leh, waxa ku kalifayna waa leyska ogyahay
 
Sidaa darteed walaalayaal sida uu ku doodayo inankan FAHAD YAASIIN waa arin aan waxba ka jirin, Suufiyadana inuu u tilmaamo Allah ka baqa iyagoo lagu yaqaan Allah ka cabsiga umadoodana la qeybsadaan dhib iyo dheef, isagoo kuwa aan diir naxa laheyn masaakiinta ay dulliga badeena ee ku nool qaxootinimada dhismayaashii hore ee dowladda baahi ugu le'anayaan halka ay iyagu ku jiraan daaro dabaqado ah + AC iyo cunto nooc walbo leh waa kaaf iyo kala dheeri.
 
Suufiyada waxba u dhimi meyso dacaayadaha raqiiska oo kuwii kaa horeeyay ayaa ka daalay, Aaway ibnu teymiya, aaway kii waalnaa ina cabdil wahaab, kuwa la soo cabsiiyay fikirkoodii ee haatan soomaaliya nala jooga kuna waashay siyaasaddana, waa ka daaleen dacaayadaha xitaa waxay isku dayeen inay xoog ku baabi'iyaan taasoo ay dhacday marar badan iney weerar ku qaadaan masaajido lagu Allah baryayay suubanaheenana SalaLLaahu caleyhi wasallam na lagu amaanayay ku dilaan culimo iyo caamaba, dulmigaasoo Rabbi aanu dib u dhigin  oo waa tii lagu saliday Ethiopia iyo madaxweyne Cabdullaahi Yusuf oo aan dib loo arag illaa waqtigan oo ay ku xoogeysanayaan muqdisho balse waxan leeyahay haddii ay kuwan xaq ku taagan yihiin maxaa looga waayay guul xitaa hal mar oo daba dhigay guul darada tan iyo waqtigii ibnu teymiy!
aha ay ku waasheen, wey iska caddahay oo waa baadilka iyo gardarada ay la wareegayaan dunida islaamka.
 
Allahayow xaqa inagu hanuuni mar walba.
 
Muuse Axmed
museahmed70@maktoob.com

Afeef: Aragtida qoraalkan waxaa leh qoraaga ku saxiixan