Waxaa is soo taraya maalinba maalinta ka danbeysa eedaymaha kulul iyo carada sida joogtada ah ka soo yeeraya dadyowga muslimiinta ee ku dhaqan barriga dhexe, gaar ahaan shirkadaha carbeed ee dalalka Sacuudi Careebiya, Imaaraadka iyo Kuweit ee iyagu heshiis ganacsi la leh Denmark.

Xiriirkan ganacsi ayay u badan tahay inuu waxyeeleeyo, kadib markii mid ka mid ah wargays ka soo baxa dalka Denmark uu si weyn meel uga dhacay maqaamka Rasuulka Muxamed (scw).

Fatwada ka soo yeeray Muftiga Sacuudiga

MUFTIGA SACUUDIGA SH. CABDIL CAZIIZAALA-SHEIKH

Maalinimadii arbacada la soo dhaafay ayay ahayd markii muftiga dalka Sacuudiga Sh. Cabcicasiis Aala-Sheekh uu soo saaray fatwo uu ugu yeerayo shirkadaha sacuudiga, iyo guud ahaan ganacsatada muslimiinta inay jaraan xiriirkooda dhaqaale ee ay la leeyihiin shirkadaha laga leeyahay Denmark, wuxuuna dhinaca kale u soo jeediyay xukuumadda Denmark inay jawaab cad ka bixiso aflagaaddada uu wargayska Jyllands Posten u gaystay Rasuulka (scw), kadib markii uu wargayska mid ka mid ah bogaggiisa ku soo bandhigay sawiro-gacmeedyo gaarayay 12, sawiradan oo aad foolxumaa ayaa lagu sheegay inuu ahaa qofkii ku sawirnaa Nebiga (scw).

Fatwadaas uu soo saaray muftiga weyn ee Sh. Cabdil-casiis, markay ka soo wareegatay wax ka yar 24 saacadood, ayaa waxay xukuumadda Sacuudiga u yeeratay safiirkeeda u fadhiyay dalka Denmark, iyadoo sidaas jawaab uga dhigtay carada ay ka muujiyeen sida weyn ee meel looga dhacay muqaddasaatka islaamka.

Waxaa tallaabadaas oo kale sameeyay dalka Kuweit oo sidoo kale uu yeeratay safiirkooda, halka maanta oo axadna (Jan 29) gebi ahaanba albaabada loo laabay safaaraddii Libya ay ku lahayd Copenhagen, xarunta dalka Denmark. Waxay arrimahan oo dhan jawaab uga dhigeen carada weyn ee ay ka muujiyeen sawiro-gacmeedyadii lagu been-abuurtay Rasuulkeena Muxammad (scw) oo ka hufan dhammaan xad-gudubyadaas foosha xun ee ay isaga u nisbeeyeen.

Guud ahaan, saxaafadda Denmark ayaa maalmahan si weyn u hadal haya dhibaatada uu sababay wargayska Jyllands Posten, iyadoo la sheegay inay jiraan warshado iyo shirkado deenish ah oo muujiyay walaaca iyo khasaaraha dhaqaale ee iyaga la soo gudboonaatay, kadib markii shirkado carbeed ay gebi ahaanba jareen xiriirkii dhaqaale ee ay la lahaayeen, waxayna shardi uga dhigeen inuu sii socdo xiriirkooda ganacsi in xukuumadda Denmark iyo wargayska Jyllands Posten ay cudurdaar cad ka soo saaraan arrimaha sawiro-gacmeedyada, taasoo aan ilaa iyo hadda aan si dhab ahaan loo arag. Shacabka Sacuudiga ayaa waxaa taleefannada gacanta ee Cellphone-ka ah loogu soo dirayay oraahyo ay ka mid yihiin "ha gadanin alaabta laga keeno Denmark iwm", iyadoo dhinaca kalena la sheegay in boqolaal shaqaale u dhashay Denmark ay khatar ugu jiraan in laga eryo shaqooyinkooda, kadib markay la soo gudboonaatay dhibaatadan dhaawacday ganacsigoodii.

iibsanmayno alaabaha lagalaga keeno Denmark, ayaa kuqornaa shacabka Sacuudiga oo joojiyay in ay gataan alaabaha Denmark lagakeeno

Hans Skov Christensen

Warshadda caanaha ee Arla ee laga leeyahay Denmark ayaa wargayska Politikenee Denmark ka soo baxa daabacay maalintii dorraad ahayd ee ay bishu ahayd 27-ka jannaayo, in warshaddaas Arla ay khasaaraan maalin walba lacag gaaraysa toban malyuun oo lacagta Dk, tanoo u dhiganta lacag lagu qiyaasay 1 malyan iyo 600,000 USD ($1.6 Million). Guud ahaan, waxay warshadda Arla u dhoofisaa sannad walba badeeco lagu qiyaasay ilaa 3 bilyan oo lacagta deenishka ah. Arla oo keliya ma ahan shirkadaha deenishka ee khasaarahaan la soo gudboonaatay, waxaa kaloo jira kuwo kale sida shirkadda dhoofisa daawada ee loo yaqaano Novo, waxay maanta shaaca ka qaadeen inay khasaarayaan ilaa 50 malyuun sannadkan aynu ku jirno, una dhiganta ilaa 8,4 malyan oo USD, iyadoo ay jiraan sharikado kale oo iyagana lala socodsiiyay in xiriirkooda dhaqaale ee ay la lahaayeen dalalka Kuweit, Qatar iyo Imaaraadka uu hakad galay, waxayna sabab uga dhigeen siday dowladda Denmark uga aamustay aflagaaddadii ay qoreen wargayska Jyllands Posten.

Khasaarahan intan le’eg, waa tan keentay inuu madaxa warshadaha Denmark Hans Skov Christensen uu si toos uga codsado wargayska Jyllands Posten caddaymo la xiriira sababta keentay fidinta sawiro-gacmeedyada sababtay inay si weyn u dhaawacdo dareenka dadyow tiro badan oo muslimiin ah. Sidaasoo kale, madaxa xisbiga bahwadaagga la ah dowladda ee Konservative-ga ayaa wargayska u soo jeediyay inay cudurdaar ka bixiyaan aflagaaddada weyn ee ay sida weyn u dhaawacay dareenka iyo muqaddasaatka muslimiinta.

Safiirka Denmark ee Sacuudiga oo dhaleeceeyay JP

Safiirka Denmark ee u fadhiya dalka Sacuudiga ayaa si weyn dhaleecayn ugu soo jeediyay wargayska Jyllands Posten, wuxuuna isagoo shaleey waraysi siiyay taleefishin laga leeyahay Mareekanka sheegay in wargayska JP uusan dhibaataynin keliya muslimiinta ku dhaqan dalka Denmark, ee uu si weyn u dhaawacay malaayiin muslimiin ah oo ku kala nool dunida daafaheeda kala duwan. “waa wax aad loola yaabo in wargays si private loo leeyahay uu sidan weyn dadyow u dhaawaco, ma aha oo keliya muslimiinta Denmark, ee waa muslimiinta meel walba ku nool” ayuu yiri Hans Klingenbjerg oo ah safiirka Denmark u fadhiya dalka Sacuudiga. Hadalkan ayaa wuxuu caro weyn ku abuuray xisbiga xag-jira ee Dansk Folkeparti oo ku tilmaamay inuu safiirka ka soo horjeestay siyaasaddii uu dalkiisa u metalayay.

Calankii Denmark oo la gubay

calankii Denmark oo lagubayo

Calankii Denmark oo ay caruurta falastiiniyiinta ku korsocdaan

Maanta oo axad ah (Jan 29), ayaa loogu hadal badnaa saxaafadda Denmark arrimaha la xiriira jawaabaha ay muslimiinta ka bixiyeen sawiro-gacmeedyadii ay daabacday wargayska JP, iyadoo maanta la inka tusayay tv-yada iyadoo dhalinyaro falastiiniyiin ay gubayaan calanka deenishka, ayna ku hanjabayeen inay beegsan doonaan shacabka deenishka ee dalalkooda booqashada ku yimaada, si ay falkaas ay jawaab uga dhigaan ayay yiraahdeen sawiradii meel-ku dhaca ku aha Rasuulka (scw). Wasiirka arrimaha dibadda dalka Denmark Per Stig Møller ayaa welwel weyn ka muujiyay xiisaddan sii kordhaysa, wuxuuna shaaca ka qaaday gelinkii danbe ee maanta in wasaaradda arrimaha dibadda ee Dk ay berito oo isniin u diri doonto dalalka Khaliijka wafdi la kulmi doona madaxda dalalkaas.

Xisbiga labaad ee social-ka ayaa weli ku celcelinaya inay habboonaan lahayd inuu Ra’iisal wasaaraha la kulmo muslimiinta Dk, isla markaasna mowqif cad uu iska taago sawiro-gacmeedyada caro-geliyay guud ahaan muslimiinta.