|
AYAAN XIRSI OO QARKA U
SAARAN IN LAGALA NOQDO DHALASHADA HOLLAND
Ayaan Xirsi Magan
Wasaaradda arrimaha socdaalka ee dalka
Holland ayaa guda-galay inay baaritaanno ku soo oogaan wararka sheegaya
inay Ayaan Xirsi "Cali" oo xubin ka ah baaralamaanka Holland ay warbixinno
qaldan siisay waaxda socdaalka Holland. Waa xilligii ay dalbanaysay
codsigeeda laajinimada ee dalka Holland sannadkii 1992-kii. Ayaan oo 36 jir
ah, ayaa horey u sheegtay in lagu qasbay guurka nin soomaaliyeed oo la
sheegay inuu ku nool yahay Canada, iyo inuu magaca awoogeeda uu Ali yahay,
iyo inay si toos ah uga soo qaxday dagaalladii Soomaaliya ka qarxay iyo kuwo
kale oo badan ayaa gadaal danbe lagu ogaaday inay ka fogaayeen xaqiiqda.
Taleefishin laga leeyahay Holland, laguna
magacaabo Zembla
TV ayaa booqday gurigii ay Ayaan Hirsi "Cali" ka degganayd Nairobi dalka Kenya
iyo sidoo kale iskuulkii ay dhiganaysay 12-ka sanno kuna yaalay magaallada
Nairobi. Sannadahaas ay waxbarashada ku qaadanaysay dalka Kenya, ayaa dalka
Soomaaliya ka caafimaad qabay burbur iyo jahawareerka qaxootinimo. Waa
billowgii siddeetameeyadii ilaa dhammaadkiisii.
Wuxuu weriyuhu waraystay dhammaan
macallimiintii Ayaan Xirsi Cali iyo wiil ay walaalo yihiin oo lagu magacaabo
Mahad Hirsi Magan oo hoosta ka xariiqay inaynan sinnaba sax u ahayn cid ku
qasabtay Ayaan Xirsi inay guursato wiilka soomaaliyeed ee ku nool dalka
Canada. Hase ahaatee, iyadu waxay sananadihii la soo dhaafay goobo badan iyo
qoraallo badan ku xustay inuu jiray wiil lagu qasbay inay guursato, wiilkan
oo degganaa dalka Canada.
Rita Verdonk oo ah wasiiradda is-dhaxgalka
Holland, isla markaasna ka soo jeeddo xisbiga ay ka tirsan tahay Ayaan Hirsi
ee VVD ayaa wargayska Independent kana soo baxa England shaleey u sheegtay
in sharciga oo loo hoggaansamo ay dadkoo dhammi u siman yihiin, waxayna
iyadoo arrinkan ka hadlaysa tiri "dooni maayo inaan arrintan ka hor-dhaco,
hase ahaatee sharciga dadkoo dhan way u siman yihiin"
Waxay Rita Verdonk intaasi raacisay inay
Ayaan Hirsi qiratay inay hadallo xaqiiqada ka fog sheegtay markay
dalbanaysay codsigeeda laajinimo sannadihii 1992-kii.
Ayaan Hirsi ayaa markii uu weriyaha tusiyay
cajalkii uu ka soo duubay Kenya tiri hadalladan "waa wax aad loola yaabo",
waxayna iyadoo indhaha rogrogaysa haddana tiri "haa, waan qiranayaa inaan
been sheegay". Waxay kaloo Ayaan Hirsi qiratay in magaca awoowga uu yahay
MAGAN, uusanna ahayn Cali, laakiin waxay saxaafadda iyo dadweynaha reer
Holland damacday inay ku qanciso hadallo ay naxariis kaga raadsanayso. Waa
markay oranaysay "dadkii oo dhan miyay waasheen??" oo ay ulajeedday in dadka
ka danbeeyay diyaarinta barnaamijkan inay ugu dan lahaayeen aargoodsi
siyaasadeed. Hase ahaatee, waxay axaddii la soo dhaafay iyadoo markale
qiranaysa beenteeda tiri "haa, waa sax inaan been sheegay si aan u helo sharciga magangalyo
ee Holland, warbixinnadan waxay ahaayeen kuwo guud ugu yaraan laga soo
billaabo sannadkii 2002"
Xubno badan oo ku jira Baarlamaanka Holland
ayaa soo jeediyay in Ayaan Hirsi lagala noqdo dhalashada Holland, dabadeedna
dib loogu celiyo meeshay ka timid (Soomaaliya), halka tiro kale oo aan
badnayn oo siyaasiyiin ah ay qabaan in fadeexaddaan la soo gudboonaatay
Ayaan ay ka danbeeyeen dad cadow ah oo xagga siyaasadda kaga soo horjeeda
gabadhaan soomaaliyeed.
Ayaan Hirsi Ali waxay ku caanbaxday
aflagaaddada Muqaddasaatka Islaamka. Weliba wuxuu si weyn magaceeda adduunka
ugu u soo shaac baxay, kadib markii la dilay soo saarihii Theo van Gogh
filimkii ay qortay sanandkii 2004 oo ay ku sheegtay inuu islaamku duudsiiyo
xuquuqda haweenka. Sannadkii dhowaa ee 2005-kii ayaa misna Ayaan Hirsi soo
saartay filim ay sidoo kale sawiro xun uga bixinayso diinta islaamka, iyadoo
ay cabasho weyn ay filimkaas ka muujiyeen guud ahaan dadyowga muslimiinta,
gaar ahaan jaaliyadaha muslimiinta ee ku dhaqan Holland.
 Inkastoo ay jireen
caradaas iyo cabbashadaas is daba jooga ah ee ka imaanayay dadyowga
muslimiinta, hase ahaatee waxaa dhinaca kale garab socday taageerooyin iyo
abaalmarinno ay la gabar taagnaayeen Ayaan Hirsi Ali mawaaqiifteeda la
xidhiidha islaamka shakhsiyaad sarsare iyo xukuumado u badan galbeedka.
Sannadkii dhowaa waxay Ayaan Hirsi Ali ay ka guddoontay Ra'iisal wasaaraha
Denmark Anders Fogh Rasmussen abaalmarin weyn, iyadoo booqashadii ay Denmark
ku timidna si weyn loogu soo dhoweeyay. Sidoo kale, waxay horey booqasho ugu
tagtay Washington, xarunta dalka Mareekanka.
Si kastaba arrinku ha noqdee, waxaa hubaal
ah inay Ayaan Hirsi Ali ay la soo gudboonaatay xaalad aad u adag, taasoo ay
si weyn uga fajacisay taageerayaasheedii ay ugu horeeyaan xisbigeeda xagjira
ee lagu magacaabo VVD iyo kuwa kale ee ka macaasha nacaybka islaamka. Inkastoo
ay maalinimadii isniinta ay sheegtay inay faraha kala baxayso siyaasadda,
haddana waxay si toos ah ula hadli doonta maanta oo talaado ah xubnaha
baarlamaanka Holland, si ay u muujiso mowqifkeeda ku aaddan fadeexaddaan
aadka u weyn. Ka bixitaankeeda siyaasadda waxay sabab uga dhigtay arrimo ka
madax bannaan filimkan danbe ee laga soo duubay dalka Kenya.
 Waxaa isku soo dubaridey
Ibraahim Saalax
ibra88@hotmail.com
SomaliTalk | DENMARK
Faafin: SomaliTalk.com | May 16, 2006
QORAALDII SAWIR-GACMEEDYADII LAGU
AFLAGADEEYEY RASUULKA NNKH:
01 |
02 |
03 |
04 |
05 |
07 |
08 |
09 |
10 |
11 |
12 |
13 |
14 |
15 |
16 |
17 |
18 |
19 |
20 |
21 |
22 |
23 |
24 |
25 |
26 |
27 |
28 |
29 |
30 |
31 |
SOOMAALIDA EURO-AMERICAN: SANNADO BADAN AYAAN KU LUMINAY YURUB
SOOMAALIDA
MINNESOTA: Safarkii Ibraahim Saalax... Guji |
