::: SomaliTalk.com :::

Shariif xasan Shiikh Aadan oo helay Fiisihii dal ku galka Mareykanka
Maamulka Putland oo Ka jawaabey hadalkii Cali Maxamed Geedi
Cali Max’ed Geedi oo u digay Shirkad baara ee....
Cali Max’ed Geedi oo markiiba fuliyay Qodobo ay soo fartey Dowladda Talyaaniga
Jaamac Aadan Dheere oo isaga oo ku sugan Jowhar dhaliiley dowladaFederaalka, Xabsigana loo taxaabay...
Wakiilkii warfaafinta ee maamulka Max’ed Dheere oo Xabsi loo taxaabey
War Saxaafadeed Gollaha Midnimada Qaranka Soomaaliyeed....

Wararkii Maanta::: Aug 29, 2005
Waxaa isku soo dubaridey:
Amiin Yuusuf Khasaaro
Email amiinkhasaaro@hotmail.com

Shariif xasan Shiikh Aadan oo helay Fiisihii dal ku galka Mareykanka

Cabdulaahi Yuusuf oo beeniyey in loo diidey Fiisihii Mareykanka

Gudoomiyaha Baarlamaan Shariif Xasan ayaa maanta helay Fiisihii Dal ku gal wadanka Mareykanka wuxuu gudoomiyaha ka qaybgeli doonaa shirweyne ay isugu imaanayaaan Madaxda Baarlamaanada Adduunka oo ka dhacaya Magaalada New york ee dalka Mareykanka sidoo kale gudoomiyaha wuxuu kaloo helay dal ku gal wadanka Ingiriiska isagoo halkaa kula kulmi doona Jaaliyadda Soomaaliyeed ee ku dhaqan waddanka IIgiriiska

Dhinaca kale Madaxweyne Cabdulaahi Yuusuf ayaa si kulul u beeniyey warar ay faafiyeen qaar ka mid ah Idaaacadha Muqdisho oo ah in loo diidey Fiisihii dal ku galka Mareykan si uu uga qaybgalo Xaflada loo sameeynaya sannad guuradda Lixdamaad ee ka soo wareegtey Aas-saaskii Qaramada Midoobey oo ku beegan bisha Sabtembar ee fooda nagu soo haysa wuxuuna wararkaas ku tilmaamey kuwo aan sal iyo raad toona lahayn wuxuu sheegay Cabdulaahi in uu tagayo Mareykanka isla markaana Qaramada Midoobey ka codsan doono in soomaaliya laga qaado Cunaqabateynta hubka si ay u sahlanaato in soomaaliya loo soo diro ciidamo nabad ilaalin ah

Dhinaca kale Shiikh Aadan oo ah gudoomiyaha Baarlamaanka oo haatanna ku sugan Magaalad Nairobi ayaa shalay la weydiiyay in uu kulan la yeelan doono ra’isul wasaare Cali Max’ed Geedi oo isna ku sugan Magaalada Nairobi wuxuuna sheegay in uu diyaar u yahay in kulan aan shuruud ku xirnayn la yeesho ra’isul wasaare Cali Max’ed Geedi.

Shariif Xasan Shiikh Aadan waxa uu sheegay in uu aad u doonayo in la soo afjaro khilaafka u dhexeeya xubnaha labada gole ee ku kala sugan Muqdisho iyo Jowhar.

“Sidaani dan uma ah bulshada Soomaaliyeed waxaana u soo dhaaranay in aan badbaadiniyo shacabka Soomaaliyeed” ayuu yiri Shariif Xasan Shiikh Aadan, sidoo kale waxaa isna wax laga weydiiyay in uu la kulmayo gudoomiyaha baarlamaanka Ra’isul wasaare Cali Max’ed Geedi waxa uuna sheegay in uu diyaar u yahay in kulan la yeesho gudoomiyaha Baarlamaanka balse waxa uu daba dhigay ra’isul wasaaruhu in qorshihiis uusan ugu jirin kulan uu la yeesho gudoomiyaha Baarlamaanka.

Maamulka Puntland oo Ka jawaabey hadalkii Cali Maxamed Geedi

Kulan deg deg oo ay saakey isugu yimaadeen Musuuliyiinta Maamulka Puntland ayaa si aad ah looga doodey hadalkii Raiisul wasaare Geedi ee ahaa in shirkadaha shidaalka ka qodayaa Putland ay ruqso ka qaataan Dowladda Federaalka wuxuuna si gaar ah ugu digey shirkad Australia ah oo shidaal ka baari rabta deegaano ka tirsan Puntland, waxayna sheegeen in Geedi uusan si wanaagsan u akhrisan Dastuurka Federaalka oo qoraya in cid kastaa ay xaq u leedahay in ay shidaal soo saarato waxay kaloo ay sheegeen in loo baahan yahay Cali Maxamed Geedi uu raaligelin ka bixiyo hadalkaas oo ay ku tilmaameen mid xad gudub ku ah maamulka Puntland, waxay kaloo sheegeen in aysan cidna uga haybeysaneyn qodista shidaalka iyo Gaaska dabiiciga iyagoo sheegey in Raisul wasaaraha ay dabada ka riixayaan Dowlado shisheeye oo aysan carbaabin, sidoo kale Madaxweynaha Maamul goboleedkaas Gen Cadde Muuse ayaa maanta ka ambabaxay Puntland ayadoo warar sheegayaan in uu sii mari doono Dalka Imaaraadka Carabta halkaas oo la sheegay in uu ku soo saxiixi doono heshiisyo ku aadan qodista shidaalka deegaanada Puntland, warar kale ayaa tibaxay in uu kusii jeedo dalka Jarmalka oo caafimaad ahaan uu u tegayo, waxaa kale oo maalmahan Puntland laga hadal hayey in Cadde Muuse uu cafimaad ahaan u tegi doono Pakistan. Dhanka kale Madaxweyne Cabdulaahi Yuusuf oo dhawaan la wareystey ayaa sheegey in ay soo dhaweynayaa shirkadaha shisheeye ee shidaalka ka qodaya dalka iyadoo aan lagu xireyn wax shuruud ah.

Cali Max’ed Geedi oo u digay Shirkad baara ee...

Cali Max’ed Geedi oo ah ra’isul wasaaraha dowladda Federaalka oo shalay shir jaraa’id ku qabtay Magaalada Nairobi ee dalka Kenya ayaa waxa uu diginiin u jeediyay dhamaan shirkaddaha shidaalka ka baaraya qaybo ka mid ah dalka, kuwaas oo uu sheegay in aysan marnaba la soo xiriirin dowladda Federaalka oo iyadu xaq u leh bixinta shatiga qodida ama baaridda shidaalka ku jira gudaha dalka Soomaaliya, waxa uuna ra’isul wasaare Cali Max’ed Geedi si gaar ah u xusay shirkad Australian ah oo maamulka Puntland uu heshiis la galay taas oo haatan shidaal iyo gaasba ka baari rabta deegaano ka tirsan maamulka Puntland. “Haa waan la xiriiray Gen. Cadde Muuse waxaana u sheegay in aysan xaq u lahayn waxaan dowladda Federaalka ogayn oo uu maamulkaasi sameeyo gaar ahaan qodista shidaalka” ayuu yiri Cali Max’ed Geedi oo sheegaay in Gen. Cadde Muuse uu ka dhega fureystay baaqii dowladda, waxaa kalloo oo uu sheegay Ra’isul wasaare Cali Max’ed Geedi in arrintaasi ay ka wada hadleen Madaxweyne C/llaahi Yuusuf Axmed isna uusan wax jawaab ah ka bixin wuxuuna ku gaabsaday in shirkad kasta oo shidaal ka baareysa Soomaaliya ay imaan karto. Ra’isul wasaare Cali Max’ed Geedi waxa uu sheegay in shirkadaha haatan ku sugan dalka in ay si dhaqsi ah ula soo xiriiraan haddii taa ay yeeli waayaana wixii dhibaato ah ee ku yimaada mas’uuliyadeeda iyaga dusha ay u radan doonaan, “Dowladdu kama horjeedo in dalka laga baaro shidaal balse waxaa loo baahan in arrinaasi nidaam loo soo maro” ayuu yiri Cali Max’ed Geedi oo sheegay in ay jiraan heshiisyo hore oo dowladihii horey ay la galeen shirkaddu ka socday Yurub.

Cali Max’ed Geedi oo markiiba fuliyay Qodobo ay soo fartey Dowladda Talyaaniga

Ra’isul wasaare Cali Max’ed Geedi ayaa waxa uu deg deg u fuliyay qodobo ay dowladda Talyaanigu soo fartay markii uu dhawaan gaaray dalka Talyaaniga uuna kulamo la yeeshay mas’uuliyiin ka tirsan dalka Talyaaniga.

Mid ka mid ah qodobadii la soo faray ayaa waxaa ka mid ahaa in marka hore uu digniin u jeedo shirkadaha shidaalka ka baaraya gudaha dalka Soomaaliya oo qaarkood la sheegay in ay ka yimaadeen Qaaradda Aasiya.

Shir jaraa’id oo uu shalay qabtay Cali Max’ed Geedi Magaalada Nairobi ayaa waxa uu sheegay in shirkad aan wax ruqsad ah ka haysan dowladda Federaalk aysan waxa shidaal ah ka baari Karin gudaha dalka Soomaaliy, isagoo sheegay in shirkado Yurub ay heshiis la galeen dowladihii hore waxayna shirkadahaasi qaarkood ay ka soo jeedaan dalka Talyaaniga.

Waxyaabaha kale ee dowladda Talyaaniga soo fartay ra’isul wasaare Cali Max’ed Geedi in aan la qaadan Karin Muuska Soomaaliya kaddib markii dhawaan deegaano ka tirsan Sh/hoose ay booqdeen ganacsato ka socotay wadamada Aasiya oo ay ka mid yihiin Shiinaha, Kuuriya iyo Maleesiya.

Dowladda Talyaaniga iyada ayuu u xiran yahay suuqa Muuska ee Soomaaliya kaddib marki shirkad Talyaani ah oo qaadi jirtay Muuskaasi ay dalka ka baxday xilligii UNISOM.

Jaamac Aadan Dheere oo isaga oo ku sugan Jowhar dhaliiley dowladaFederaalka

Jaamac oo Xabsiga loo taxaabey

Jaamaca Aadan Dheere oo sheegay in uu yahay gudoomiyaha isbahaysiga dib u soo celinta qaranka Soomaaliyeed ayaa isaga oo ku sugan Magaalada Jowhar oo uu ka taliyo Max’ed Dheere waxa uu si kulul u dhaliilay dowladda Federaalka kuna tilamaamay mid aan ka soo bixin waxyaabihii loo doortay. “Bal fiiriya meelahay kala degeen oo kala ah Jowhar, Muqdisho, Kismaayo, Xudur iyo Baladweyne” ayuu yiri Jaamac Aadan Dheere oo sheegay in loo baahan yahay in dowladdu ay iscashiso maadaama ay ku fashilan tahay waxyaabihii loo doortay ama lagu taageeray.

“Ma ahan in aad shacabka u sheegtaan been oo aad u abaabushaan dagaalo hor leh” ayuu yiri Jaamac Aadan Dheere oo shalay shir jaraa’id ku qabtay Magaalada Jowhar iyadoo aysan ka muuqan wax baqdin ah maadaama dowladda ee ku sugan Jowhar ay marti u tahay ama nabadgelyada uu kafaala-qaaday Max’ed Dheere waxayna tani keeni doontaa in wasiiro badan iyana ay raacaan wadada Jaamaca Aaadan Dheere.

war hadda na soo gaarey Magaalada Jowhar wuxuu sheegayaa in Xabsiga loo taxaabey Jaamac Aadan Dheere ka dib markii magaalada Jowhar uu ka sheegay in loo baahan yahay in ay dowlada is casisho maadaama ay ku guuleysan waysey samatabinta Shacabka soomaaliyeed waxaana arintan ka caroodey Gudoomiyaha Gobolka Shaeeladda Dhexe Maxame4d Cumar (Maxamed Dheere)

Wakiilkii warfaafinta ee maamulka Max’ed Dheere oo Xabsi loo taxaabey

Wararka naga soo gaaraya Magaalada Jowhar waxay sheegayaan in wakiilkii warfaafinta ee maamulka Max’ed Dheere, Xasan Cabdule Max’ed (Xasan Dhegeey) xabsiga loo taxaabay kaddib markii ay is qabteen xoghayaha guud ee maamulka Axmed Caadle.

Xasan Dhegeey oo haatan ku xiran xibsiga Magalaada Jowhar ayaa waxaa soo qabtay ciidanka Booliiska ee gobolka, iyadoo ay waxyaabihii isku qabteen mudane Caadle ay ahaayeen arrimo la xiriira dhinaca maamulka, balse warar kale ayaa waxay sheegayaan in xirigaani uu ka dambeeyay gudoomiyaha maamulka siyaasadda gobolka Sh/dhexe Max’ed Cumar Xabeeb (Max’ed Dheere).

Ma ahan markii ugu horeysay mas’uuliyiin ka hooseesa Max’ed Dheere xabsiga oo taxaabo waxaana dhawaan xabisga la dhigay sargaal sare oo ka socday hay’adda UNICEF oo ka howlgala gobolka Sh/dhexe.

W/D Amiin Yuusuf Khasaaro
Email amiinkhasaaro@hotmail.com

War Saxaafadeed Gollaha Midnimada Qaranka Soomaaliyeed.

Gollaha Midnimada iyo Nabada Qaranka Soomaaliyeed waxaa uu si adag u cambaareynayaan xariga sharci darada ah ee loo geystay Gudoomiyaha Golaha Midnimada Qaranka Mudane Jaamac Adan Dheere oo ay maamulka Maxamed Dheere Xabsiga dhigeen 28/8/2005 ka dib markii uu gudoomiyuhu qabtay shir jaraa,id oo uu uga hadlayey arrimaha murugsan ee dalka Soomaaliya.

haddaba Gudiiga Fulinta ee golahha Midnimada Qaranka ee uu madaxda ka yahay Mudane Jaamac Adan Dhere shir deg deg ah oo ay yeesheen Xiritaankii Gudoomiyaha ka dib waxaa ay soo saareen war saxaafadeedkaan.

Golaha Midnimada Qaranku waxaa ay ugu baaqayaan madaxda Dowladda FKGM ah ee ku sugan Magalada Jowhar iyo Maamulka uu madaxda ka yahay Maxamed Dheere-ba inay si shuruud la'aan ah ku siidaayan Gudoomiye Jamac Adan Dheere.

Golluha Waxaa uu cabaareynaa Madaxweyne Cabdullaahi Yuusuf oo asagu bixiyey amarka lagu xirey Gudoomiye Jaamac Adan Dheere wuxuuna gollaha ka dalbanayaan madaxda dowladda FKMG ah ee uu ugu horeeyo Madaxweyne Cabdullaahi Yuusuf inay raali galin buuxda ka bixiyaan xariga sharci darada ah ee ay kula kaceen gudoomiyaha Gollaga Midnimada Qaran oo asagu tilmaamey sida looga gudbi karo dhibaatada haysata ummadda Soomaaliyeed.

Goluhu wuxuu taageerayaa War-saxaafadeedkii Gudoomiyaha oo ahaa mid ka turjumayey baahida shacabka Soomaaliyeed ee u baahan dowladda wax u qabata kana saarta dhibka .

Golluhu wuxuu xaqiijinayaan inay sii wadi doonaan dhaq-dhaqaaqooda siyaasadeed ee ay uga qeyb qaadanayaan xal u helidda dhibaatada haysta ummadda Soomaaliyeed.

Ugu dambeyntii wuxuu Golluhu u mahad celinayaa dhamaan hay'addaha iyo shaqsiyaadka ka dhiidhiyey xariga Gudoomiye Jamac Adan Dheere gaar ahaan ururda kasoo saaray war murtiyeedyada.

Mahadsanidiin

29/8/2005
A.A Mohamed
Madaxa Warfaafinta ee Golaha NMQ.
zakizakii@hotmail.co.uk

Faafin: SomaliTalk.com | Aug 29, 2005